البت ومشاكل الصيف

السلام عليكم يااحلي فتوكات

النهاردة هانبتدي سوا سلسلة البنات والصيف ودي ان شاء الله هانناقش فيها كل المشاكل الصيفية
اللي بتقابلنا كلنا مع دخول الصيف والحر

والنهاردة هانبتدي باول مشكلة

العرق ومنطقة تحت الابط

طبعا العرق مشكلة كبيرة اوي لينا كلنا وشغلنا الشاغل ازاي نمنع العرق
ودي اول غلطة
العرق ده شئ مفيد جدا جدا ربنا خلقه عشان يخلصنا من الافرازات الدهنية والاملاح الزايدة
والسموم اللي بتضر جسمنا والعرق اساسا ملوش ريحة لكن اللي بيديله ريحة مش لطيفة
البكتيريا اللي بتتراكم عليه
يبقي العرق مش مشكلة بالعكس ده نعمة مينفعش نتخلص منها لكن ممكن نتخلص من ريحتها

طيب نعمل ايه بقي ونمنع ريحة العرق ازاي؟؟؟؟؟؟؟؟؟؟؟

اولا:ايه اللي بيخلي ريحة العرق مش ظريفة غير البكتيريا
-ممكن السمنة المفرطة لان الافرازات الدهنية بتبقي اكتر بكتير وفي احتكاك كتير

-بعض المشروبات والاكلات اللي بتفرز في العرق(زي الحلبة-الشبت-البسطرمة)

-عذرا يابنات في النقطة دي بس لازم نتك عليها وهي عدم الاهتمام بنظافة المنطقة دي وازالة الشعر منها باستمرار
لان الشعر حتي لو كان صغير بيعمل ريحة

طيب بقي خلينا نمسك نقطة نقطة ازاي نتخلص من ريحة العرق

-والله يابنات النقطة دي مهمة اوي وبتفرق كتير حاولي انك تشربي حاجات عطرية تفرز في العرق وتخلي ريحته حلوة
زي انك تحطي علي ازازة المية بتاعتك معلقة كبيرة مية ورد بجد رووووووووووووووعة بتخلي ريحة العرق ظريفة
وبتورد وتنور الوش كمان وبتخلي طعم المية احلي فيشجعك تشربي مية كتير
وممكن كمان تحطي مية نعناع بتتباع عند العطار حلوة اوي وبتريح البطن وياسلام كل يوم كباية عصير برتقال وعليها مية ورد بردو ونعناع
فظيع حتي افرازات المنطقة اياها بتبقي ريحة كويسة ده غير بقي الفيتامينات اللي هاتنور بشرتك

-تاني خطوة:خدي بالك وانتي بتجيبي مزيل عرق ممكن تستخدمي مزيل لرائحة العرق مش مزيل للتعرق
واظن فهمنا الفرق بينهم وطبعا ممنوع نستخدم حاجة للابط عليها كحول مممنووووووووووووووووووووووووع

-نظافة المنطقة بقي:
يابنات صدقوني انتو لو عملتوا كدا عمركم ابدا ماهتشتكوا من ريحة عرق
شوفي بقي الشاور اليومي بقي ده اساسي طبعا مفيش فصال ان مكنش مرتين في اليوم

المنطقة دي دايما تحرصي تكون مفيهاش شعر ابدا وانا مش هافرض عليكي طريقة ازالة
الطريقة اللي تحبيها وانتو عارفين بالنسبة لي السويت هي احلي شئ
بس انتوا وراحتكم

هدومك دايما لازم تتاكدي قبل ماتلبسيها انها مغسولة وريحتها حلوة وهدومك اكيد بتاع الخروج تتغسل علي ايدك
بشامبو او شاور جل وتعطريها بمعطر الاقمشة دايما

تجيبي شاور جل ديتول او غسول ديتول لليدين وده مايفارقش شنطتك
الصبح قبل ماتنزلي تغسلي المنطقة بيه وتنشفيها بشويش
ولو هاتحطي مزيل خالي الكحول ماشي مش هاتحطي يبقي
تعملي زيي وتجيبي ازازة ببلية دوارة وتحطي فيها زيت لوز مر وزيت جليسرين
وعصير ليمون وجبت مسك مكعبات وسيحته وحطيته عليهم وحطتهم في شنطتي
ولما بردو تروحي الشغل ولا الكلية في نص اليوم لما تطلعي المسجد كدا عشان تصلي
بردو اغسلي المنطقة بالديتول ونشفي بمناديل مبللة بس خالية من الكحول
وحطي بردو من البلية الدوارة بتاعتنا
وانسي بجد ريحة العرق واتمتعي بااحلي تفتيح ونعومة خيال للمنطقة

ومرتين في الاسبوع تعملي تقشير للمنطقة بحاجة خفيفة خالص
زي مقشر كلين اند كلير اليومي خطييييييييييييييييييييييييييييير
للبشرة ولتحت الابط لان المكان ده حساس زي بشرة الوش

وللتسلخات والالتهابات في المكان ده
مرهم كيناكوب رااااااااااااااااااااااااااااائع جدا
وللوقاية ترشي نشا فظيع بيسحب الرطوبة ويمنع الاحتكاك والتسلخات

وان شاء الله اتمني لكم كلكم صيف جميل
وانتظروني بقي في بقية الاجزاء باذن الله تعالي
ويااااااارب اكون قدرت افيدكم ولو بحاجة بسيطة
ومكنتش تقيلة عليكم
واي استفسار انا تحت امركم

:2قصثص:

منورة يا قمر

هو صح مفيد بس مشكل كبيرة